പാര പ്രോഫഷനൽസ്

പാര പ്രോഫഷനൽസ്

ആംഗലേയത്തിൽ എഴുതിയാൽ ശരിയാവില്ല .

ഇംഗ്ലീഷുകാരന്റെ പാരയും മലയാളിയുടെ പാരയും വേറെ .

"സ്വന്തം കാര്യം സിന്താബാദ്‌" എന്ന് വിചാരിക്കുന്നതും പാരയും  മോരും മൂത്രവും പോലെ രണ്ടുതരം .

പാരകൾ പലതരത്തിലും പല രൂപത്തിലും കടന്നുവരും .

കഴിഞ്ഞ അമ്പത്‌ വര്ഷങ്ങളും മൂന്ന് വൻകരകളും അഞ്ചു രാജ്യങ്ങളും എനിക്ക് തന്ന അനുഭവങ്ങൾ മാത്രമാണ് ഈവെളിപാടിനു അടിസ്ഥാനം .

അതുകൊണ്ട് തന്നെ മുൻ‌കൂർ ജാമ്യത്തിന്റെ ആവശ്യം ഈയുള്ളവനില്ല .

1.കമ്പിപ്പാര

ഈപാരകൾ വളരെ എളിമയും താഴ്മയും കാണിക്കും . ഇവരായിരിക്കും നിങ്ങൾക്ക് പുതിയ ജോലിസ്ഥലത്തെ ആദ്യത്തെ വഴികാട്ടി . നിങ്ങളെ ജോലിയിൽ എടുക്കുന്നതിന് തൊട്ടു മുൻപായിരിക്കും ഇയാളുടെ രംഗ പ്രവേശം .

മിക്കവാറും നിങ്ങളേക്കാൾ കുറച്ചു വിദ്യാഭ്യാസത്തി ലോ ജോലി പരിചയത്തിലോ താഴ്ന്ന കിടപ്പായിരിക്കും ഇയാൾക്ക് . അത് കൊണ്ട് തന്നെ കുറച്ചു അപകർഷതാ മനോഭാവം ഉള്ളിൽ കാണും . അത് ഒരിക്കലും കാണിക്കാതെ ആദ്യം തന്നെ നിങ്ങളുടെ കൂടെ ഒത്തു കൂടും . പുതിയ സ്ഥലത്തെ നിങ്ങളുടെ ആദ്യത്തെ സുഹൃത്തായി നിങ്ങളുടെ എല്ലാ ശക്തിയും ആശങ്കകളും വേഗത്തിൽ തന്നെ അറിഞ്ഞു വയ്ക്കും . പിന്നെ എവിടെ വച്ച് കണ്ടാലും താഴ്മ നടിക്കുകയും നിങ്ങളുടെ അഭ്യുദയ കാംഷിയെന്ന വ്യാജേന ഭാവി തീരുമാനങ്ങളിൽ വലിഞ്ഞു കയറി അഭിപ്രായം പറയുകയും ജോലിയിൽ ഉയര്നുപോകാനുള്ള ശ്രമത്തെ നിരുൽസാഹ പ്പെടുത്തുകയും ചെയ്യും .

നിങ്ങളറിയാതെ ഡിപ്പാർട്ട് മെൻറ് മേധാവിയോടു നിങ്ങളെ ക്കുറിച്ച് തരം കിട്ടുമ്പോൾ താഴ്ത്തി കെട്ടി മേലോട്ട് പോവുക എന്നതായിരിക്കും ഇവരുടെ പ്രധാന പരിപാടി .

2.മുളം കോൽ പാര .

ഈ പാരകൾ നിങ്ങളോട് വലിയ താൽപര്യം കാണിക്കാതെ ഞാനൊന്നും അറിഞ്ഞില്ലേ രാമ നാരായണ എന്ന നിലയിൽ സ്വന്തം കാര്യം നോക്കി നാഴിക എണ്ണുന്ന പോലെ കൂനിക്കൂടി യിരിക്കും . അതാണ് ഇവരുടെ സൂത്രം . പുറത്തേക്ക് ഓഫീസിലെഏഷണി കളിലും പരദൂഷണ ത്തിലും യാതൊരു താല്പര്യവും ഇല്ലാത്തതുപോലെ ഇവർ അഭിനയിക്കും . എന്നാൽ നിങ്ങളിൽ നിന്ന് ഇത് അറിയാൻ തീർച്ചയായും ഒരു ശ്രമമെങ്കിലും നടത്താതെ ഇവർ പോകില്ല .

തീരേ പൊട്ടൻ മാരായി അഭിനയിക്കുക യാണ് ഇവരുടെ സർഗപ്രതിഭ . അതുമൂലം നിങ്ങളുടെ കയ്യിലുള്ള സൂത്ര പ്പണി കളോ പുതിയ അറിവുകളോ ഇവർ പെട്ടെന്ന് സ്വായത്തമാക്കും . അത് ബുദ്ധിമുട്ടാണെന്ന് നേരത്തെ മനസ്സിലായാൽ നിങ്ങളെക്കൊണ്ടുതന്നെ അവരുടെ ജോലിയും ചെയ്യിപ്പിക്കും .

ഇവരുടെ പരിപാടി തക്ക സമയത്ത് ചാടി വീണ് മേധാവിയുടെ ദൌർബല്യം മുതലെടുക്കുക എന്നത് മാത്രമാണ്‌ . അവസരത്തിന് ഒരുങ്ങി പത്തിയും താഴ്ത്തി ഇവർ പതുങ്ങി നടക്കും .

3. കഠാര പ്പാര

ഇവരാണ് തമ്മിൽ ഭയങ്കരന്മാർ . "വെടക്കാക്കി തനിക്കാക്കുക " എന്നതാണ്‌ ഇവരുടെ ശൈലി .

ഇവർ പരദൂഷണത്തിൽ കേമൻ മാരാണ് . കൂടെ നില്കുന്ന വരെ പ്പറ്റി ഉള്ളതും ഇല്ലാത്തതും ആയ കുറ്റങ്ങളും കുറവുകളും പറഞ്ഞു നിങ്ങളെക്കൊണ്ടും ആ സംഖത്തിൽ പങ്കാളിയാക്കും . പിന്നെ ഡിപ്പാർട്ട് മെന്റിന്റെ തലപ്പത്ത് ഇരിക്കുന്നവരെ ക്കൂടി ദുഷിച്ച് സംസാരിക്കും . അതിനു ശേഷം ഈജോലി വിട്ട് വേറെ കാര്യം നോക്കാൻ ശ്രമിക്കുന്നതാണ് നല്ലത് എന്ന തീരുമാനത്തിൽ നിങ്ങളെ എത്തിക്കാൻ ഇവർ കഴിവതും ശ്രമിക്കും . നിങ്ങൾ പോയാൽ ഒരു മത്സരം ഒഴിവാകുമല്ലോ എന്നാണ് ഇവരുടെ വിചാരം .

4. അള്ള്‌ പാര  

അള്ള്‌ എന്നാൽ എങ്ങിനെ തിരിഞ്ഞു വീണാലും മൂർച്ചയുള്ള ഭാഗം മേലോട്ട് പോകുന്ന ഒരു പാരയാണ് .വേഗത്തിൽ പോകുന്ന വണ്ടിയുടെ ടയർ പഞ്ചർ ആക്കുക എന്ന ലക്‌ഷ്യം മാത്രമേ ഇവർക്ക് മനസ്സിലുള്ളൂ .

നിങ്ങളോട് മേധാവി കൂടുതൽ അടുക്കുന്നത് തടയാൻ നിങ്ങളെ കൂടുതൽ വിഷമമുള്ള ജോലിയോ ദൂരെയുള്ള പോസ്ടോ എടുപ്പിക്കാൻ ഇവർ വ്യഗ്രത കാണിക്കും . നിങ്ങൾ തുടക്കക്കാരനാകുമ്പോൾ ജോലിയിലെ ഈ ഉള്ളുകള്ളികൾ അത്ര പെട്ടെന്ന് നിങ്ങൾക്ക് അറിയാൻ  കഴിയില്ല . നിങ്ങളുടെ കഴിവ് തെളിയിക്കാൻ ഒരു അവസരം എന്ന് കരുതി ചാടിപ്പിടിച്ചു നിങ്ങൾ അബദ്ധത്തിൽ ചെന്ന് തല കൊടുക്കും.പിന്നെ ഊരാൻ പറ്റാത്ത കുടുക്കായിരിക്കും എന്ന് മാത്രം . ഉദാഹരണത്തിന് നിങ്ങൾ ആദ്യമായി ഒരു ആര്ക്കും വേണ്ടാതെ കിടന്ന പ്രൊജക്റ്റ്‌ എടുത്തു നടത്തിയാൽ നിങ്ങളെക്കൊണ്ട് സ്ഥാപനതിനുണ്ടായ ഉണർവും മറ്റും പറഞ്ഞു നിങ്ങളെ പൊക്കി കൊണ്ട് സംസാരിക്കും . അടുത്ത ജോലിയും നിങ്ങളെ ഏൽപിക്കും . തരം  കിട്ടുമ്പോൾ നിങ്ങളറിയാതെ നിങ്ങളെപ്പറ്റി ഏഷണി പറഞ്ഞ് മേധാവിയോടു കൂട്ടുകൂടും .

പാരകളെ തിരിച്ചറിയാൻ പ്രയാസമാണ് .

ഉദാഹരണത്തിന് അന്യ നാട്ടിൽ ഒരു ഓഫിസിലെ രണ്ടു മലയാളികൾ നിങ്ങളാണെങ്കിൽ ഒരു പക്ഷേ മറ്റേ മലയാളിയായിരിക്കും നിങ്ങളെ പാര വയ്കുന്നത്‌ . ഇനി നിങ്ങളാണ് ഒരേയൊരു അന്യ നാട്ടുകാരൻ എങ്കിൽ പാര വരുന്നത് മേധാവിയുടെ തൊട്ടു താഴെ നിങ്ങളുടെ സമ സ്ഥാനീയ നിൽ നിന്നാകും .

ഇതു എപ്പോഴും ശ രിയാകണം എന്നില്ല .

ആരെങ്കിലും നിങ്ങളോട് അളവില്ലാതെ അടുപ്പമോ നിങ്ങളെ പുകഴ്ത്തി സംസാരിക്കുകയോ ചെയ്യുന്നുണ്ടെങ്കിൽ സൂക്ഷിക്കുക . നിങ്ങളുടെ മേധാവിയായാലും ,

മോനേ .... പാര വരുന്നെടാ

ഓടിക്കോ .

[വേണമെങ്കിൽ തുടരാം]